News

ആർജ്ജിച്ചെടുക്കുന്ന ഓരോ അറിവുകളും സ്വജീവിതത്തിനും മാനവസമൂഹത്തിനും പ്രയോജനപ്പെടുന്ന രീതിയിൽ വിനിയോഗിക്കുമ്പോൾ മാത്രമേ നമ്മുടെ ജീവിതദൗത്യം പൂർത്തിയാവുകയുള്ളൂവെന്ന് പ്രശസ്ത ശാസ്ത്രജ്ഞൻ അലി മണിക്ഫാൻ. അറിവുകൾ കുത്തക വൽക്കരിക്കുന്നതിന് പകരം അത് സമൂഹത്തിന് പ്രയോജനപ്പെടുത്താൻ വിട്ടു നൽകുകയാണ് വേണ്ടതെന്നും മലർവാടി -ടീൻ ഇന്ത്യ സംഘടിപ്പിച്ച അസ്ട്രോലാബ് 2K18 ദ്വിദിന ജ്യോതിശാസ്ത്ര ശില്പശാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പ്രപഞ്ച വിസ്മയങ്ങളിലൂടെ സഞ്ചാരമൊരുക്കിയാണ് അസ്ട്രോലാബ് 2K18 സംഘടിപ്പിച്ചത്.

കോഴിക്കോട് നെസ്റ്റ് പബ്ലിക് സ്കൂളിൽ വെച്ച് നടന്ന പരിപാടിയിൽ മലർവാടി-ടീൻ ഇന്ത്യ സംസ്ഥാന രക്ഷാധികാരി അബ്ബാസ് കൂട്ടിൽ അധ്യക്ഷത വഹിച്ചു. ജമാഅത്തെ ഇസ്ലാമി അസി. അമീർ ശൈഖ് മുഹമ്മദ് കാരകുന്ന് ആമുഖ ഭാഷണം നിർവ്വഹിച്ചു. മനുഷ്യ സമൂഹത്തിനായി ദൈവം നിശ്ചയിച്ച പാഠപുസ്തകമാണ് പ്രപഞ്ചമെന്ന് അദ്ദേഹം പറഞ്ഞു. മലർവാടി സംസ്ഥാന കോഡിനേറ്റർ മുസ്തഫ മങ്കട, ടീൻ ഇന്ത്യ സംസ്ഥാന കോഡിനേറ്റർ ജലീൽ മോങ്ങം എന്നിവർ ആശംസകളർപ്പിച്ചു സംസാരിച്ചു.

കോഴിക്കോട് റീജണൽ സയൻസ് സെന്റർ എഡുക്കേഷൻ ഓഫീസർ എം.എ. സുനിൽ ശാസ്ത്ര വിസ്മയങ്ങൾ അവതരിപ്പിച്ചു. ഗോളശാസ്ത്രം ഒരാമുഖം (അബൂബക്കർ താനൂർ), വാനനിരീക്ഷണം എങ്ങിനെ (മനോജ് കോട്ടക്കൽ) മൂൺ കലണ്ടർ (ശബാബ് ചങ്ങരംകുളം) ഭൗമേതര ജീവ വിജ്ഞാനീയം (ഡോ.പി.കെ. അബ്ദുറസാഖ് സുല്ലമി), ഗോളശാസ്ത്ര ചരിത്രം (കെ. സുഹൈറലി) എന്നീ വിഷയങ്ങളിൽ പഠന ക്ലാസുകൾ നടന്നു.വിദ്യാർഥികൾക്ക് വേണ്ടി ടെലസ്കോപ്പ് നിർമ്മാണ പരിശീലനം പി.പി.മുനീറും ടെലസ്കോപ്പ് ഉപയോഗിച്ചുള്ള വാന നിരീക്ഷണത്തിന് മനോജ് കോട്ടക്കലും നേതൃത്വം നൽകി.

അസ്ട്രോലാബ് അമേച്വർ അസ്ട്രോണമി യൂണിറ്റിന്റെ പ്രഖ്യാപനം അലി മണിക് ഫാൻ നിർവ്വഹിച്ചു. മേഖല ശാസ്ത്ര കേന്ദ്രം, പ്ലാനറ്റേറിയം, അസ്ട്രോണമിക് ഗാലറി എന്നിവ സന്ദർശിച്ചു. ദ മാൻ ഇൻ മില്ല്യൺ (കണ്ടു പിടുത്തങ്ങളുടെ കപ്പിത്താൻ) എന്ന അലി മണിക് ഫാനെ കുറിച്ച ഡോക്യുമെന്ററിയുടെ പ്രദർശനവും നടന്നു. എഴുപതോളം വിദ്യാർഥികൾ പങ്കെടുത്ത ശില്പശാല റഊഫ്, ശംസുദ്ദീൻ, സൽജാസ്,നാസർ കറുത്തേനി, ഫൈസൽ, ഫാസിൽ എന്നിവർ നേതൃത്വം നൽകി.  ജനറൽ കൺവീനർ കെ.സുഹൈറലി സ്വാഗതവും ഇഖ്ബാൽ നന്ദിയും പറഞ്ഞു.